BBC Studios alypbaryjylarynyň biriniň heläkçilige uçramagyndan soň togtadylan Top Gear awtoulag şouwyny täzeden ýaýlyma bermek boýunça işe başlady. Bu barada The Sun gazeti habar berdi.
Gazetiň habar bermegine görä, BBC-niň ýolbaşçylary programmany gaýtadan ýaýlyma çykarmagy meýilleşdirýärler, sebäbi “ol gidenden soň dörän boşlugyň orny doldurylyp bilinmedi we köp tomaşaçylaryň awtoulag şouwyny göresleri gelýär”. The Sun gazeti programmanyň täze wersiýasy üçin alypbaryjylaryň başga bir toparyny düzmegiň meýilleşdirilýändigini aýtdy. Dalaşgärleri gözlemek işi eýýäm başlandy.
Gazetiň ýazmagyna görä, täzelenen Top Gear-yň ilkinji görkezilişi indiki ýyl bolup biler.
Programma 1977-nji ýyldan bäri ýaýlyma berilýär. Onuň iň meşhur döwri 2002-nji ýyldan 2015-nji ýyla çenli şouwda işlän alypbaryjylar Jeremi Klarkson, Riçard Hammond we Jeýms Meý bilen baglanyşyklydyr. Klarkson prodýuser bilen arasynda dörän düşünişmezlik sebäpli işden çykarylandan soň, Hammond we Meý hem şouwdan gitdiler we soňra The Grand Tour-yň alypbaryjylary boldular.
BBC 2022-nji ýylyň dekabrynda Surreýdäki synag meýdançasynda bolan heläkçilikden soň, Top Gear teleýaýlymynyň önümçiligini togtadypdy. Bu wakanyň netijesinde alypbaryjy Endrýu “Freddi” Flintoffa agyr şikes ýetipdi. 2023-nji ýylyň güýzünde kompaniýa şouwyň önümçiligini näbelli möhlete çenli bes etjekdigini yglan etdi.
