Halkara futbol federasiýasy (FIFA) 2026-njy ýylyň dünýä çempionatynyň final duşuşygynda taryhda ilkinji gezek Halftime Show (arakesme şüweleňi) geçirmegi meýilleşdirýändigini yglan etdi. Şüweleňiň hedlaýnerleri Madonna, Şakira we BTS bolar. Gurama bu barada X sosial ulgamynda habar berdi.
Ony guramak we oňa gözegçilik etmek işi bilen «Coldplay» toparynyň solisti Kris Martin meşgullanýar. Toparyň X-däki akkauntynda konserte gatnaşyjylar «Sezam köçesi» tele-şüweleňiniň gahrymanlary bilen bilelikde tanyşdyryldy.
Halftime Show — sport çäresiniň taýmlarynyň arasyndaky arakesmede guralýan çykyşdyr. Şeýle format iri ýaryşlarda, şol sanda ABŞ-nyň Milli futbol ligasynyň finaly bolan «Superboulyň» arakesmesinde giňden ulanylýar.
Bu konsert çagalaryň bilime we futbola bolan elýeterliligini giňeltmek üçin 100 million dollar toplamagy meýilleşdirýän FIFA Global Citizen bilim gaznasyny goldamak maksady bilen guralýar. Dünýä çempionatynyň oýunlaryna satylan her bir petekden bir dollar bu gazna geçiriler.
Mundan ozal hem FIFA oýunlaryň arakesmelerinde aýdym-sazly çykyşlary synag edip görüpdi. 2025-nji ýylyň Klublaýyn dünýä çempionatynda Doja Cat, Tems we J Balvin dagy çykyş etdi.
