Toyota kompaniýasy Ýaponiýanyň bazarynda täze Land Cruiser FJ ramaly wnedorožniginiň satuwa çykarylandygyny resmi taýdan yglan etdi. Model ýeke-täk VX komplektasiýasynda hödürlenip, bahasy 4,5 million ýena (takmynan 28 800 dollara) deňdir.
Öndüriji içerki bazarda bu modeliň her aýda takmynan 1,3 müň nusgasyny satmagy meýilleşdirýär.
Land Cruiser FJ-iň tehniki aýratynlyklaryna 163 at güýjüne (246 Nm) eýe bolan 2,7 litrlik benzinli atmosfera «dörttlügi» degişlidir. Ol 6 basgançakly Super ECT awtomatiki transmissiýasy we Part-Time doly çekiji ulgamy bilen utgaşykly işleýär.
Garyşyk aýlawda ýangyç sarp edilişi 100 km üçin 8,7 litr derejesinde yglan edildi. Uzynlygy 4575 mm bolan bu awtomobil Land Cruiser 250 (Prado) modelinden 350 mm gysgadyr, onuň teker binýady bolsa 2580 mm-e deňdir. Gysga ölçeglerine garamazdan, bagažynyň göwrümi 795 litre, yzky oturgyçlar ýatyrylanda bolsa 1607 litre ýetýär.
Gurluşy boýunça ýolsuz ýerde ýöreýän ulag öň tarapdan iki ryçagly, yz tarapdan bolsa kese dartgylary bolan dört ryçagly asma ulgamy bilen enjamlaşdyrylandyr. Inženerleriň tassyklamagyna görä, asma ulgamynyň hereketliligi we geçijilik burçlary Prado-nyň görkezijileri bilen birmeňzeşdir.
Eksterýeriň aýratynlygy hökmünde böleklere bölünen bamperleri görkezmek bolar, olar şikes ýeten aýry-aýry bölekleri çalşyrmaga mümkinçilik bermek bilen bejeriş işlerini ýeňilleşdirýär. Standart enjamlaşdyrylyşynyň sanawyna 12,3 dýuýmlyk mediulgamy, töwerege doly syn ediş ulgamy we Toyota Safety Sense howpsuzlyk toplumy girýär.
Şeýle hem kompaniýa 2027-nji ýylyň ýazynda FJ-iň bagažynda daşamak we büdür-südür ýerlerde sürmek üçin ýörite niýetlenen Land Hopper eplenýän elektrowelosipediniň çykaryljakdygyny habar berdi.
