85 dýuýmlyk «TCL X11L SQD Mini LED» telewizory geçirilen synaglaryň dowamynda takmynan 11 000 nit – iň ýokary ýagtylyk görkezdi we «PQ HDR10» standartynyň resmi taýdan bellenen 10 000 nitlik çäginden geçmegi başardy.
Bu ölçegleri meşhur synçy Winsent Teo tarapyndan geçirdi. Ol alnan netijäniň kompaniýanyň bu noutbuk we telewizor seriýalary üçin bellenilen «HDR 10 000» görkezijisinden hem ýokary bolandygyny belledi.
«Men edil ýaňy 85 dýuýmlyk «TCL X11L SQD (Super Quantum Dot) Mini LED» telewizorynda takmynan 11 000 nit ýagtylygy ölçedim. Bu hatda «PQ HDR10» standartynyň 10 000 nitlik iň ýokary çäginden hem geçýär. Munuň sarp ediji telewizor tehnologiýalary üçin hakykatdan hem taryhy wakadygyny bellemek gerek» diýip, Teo X sosial ulgamynda ýazdy.
«X11L» seriýasy TCL kompaniýasynyň flagman Mini LED telewizorlaryna degişlidir. Onuň 85 dýuýmlyk görnüşinde 14 400 sany ýerli garaňkylyk zolagy, 98 dýuýmlyk modelinde bolsa 20 736 zolak göz öňünde tutulypdyr. Şeýle yşyklandyryş ulgamy HDR sahnalarynda iň ýokary ýagtylyga ýetmäge we ony has takyk dolandyrmaga mümkinçilik berýär.
Bu ýerde gürrüň ekranyň doly yzygiderli ýagtylygy barada däl-de, eýsem käbir böleklerindäki gysga möhletli ýagtylyk partlamalary barada gidýär. Teo eger telewizor bütin ekran boýunça yzygiderli 11 000 nit ýagtylyk beren bolsa, onuň ýagtylyk akymynyň takmynan 68 800 lýumene – ýagny bir sport meýdançasyny yşyklandyryş derejesine ýetjekdigini belledi.
Synçynyň bahasyna görä, şeýle ýokary ýagtylyk uly energiýa sarp edilişi bilen hem baglanyşyklydyr. Deňeşdirmeli bolsa, TCL-iň beýleki Mini LED modelleri SDR režiminde 155 Wt-a çenli, HDR kontentleri görkezilende bolsa 690 Wt-a çenli tok sarp edip bilýärler.
