Hytaý orbital mikrograwitasiýada adamyň emeli embrionpisint gurluşlarynyň ösüşini öwrenmek boýunça dünýäde ilkinji synagyna başlady diýip, Hytaýyň Ylymlar akademiýasynyň amaly kosmos ylymlary we inženerçilik merkezine salgylanýan Sinhua habarlar agentligi habar berdi.
Nusgalar 11-nji maýda "Týançžou-10" ýük gämisinde Hytaýyň Týangun kosmos stansiýasyna eltildi. Gelenden soň, kosmonawtlar olary synag modulyna geçirdiler, ol ýerde awtomatiki ulgam her gün iýmit gurşawyny täzeläp başlady.
Taslamanyň ýolbaşçysy Ýuý Lesýanyň sözlerine görä, gurluşlar adamyň sütün öýjüklerinden döredilýär. Ol olaryň hakyky adam embrionlary däldigini we doly bahaly organizme öwrülip bilmeýändigini, diňe ylmy barlaglar üçin model hökmünde ulanylýandygyny nygtady.
"Biz kosmosdan we Ýerden alnan nusgalaryň ösüşini deňeşdirmek arkaly, kosmos gurşawynda adam embrionlarynyň irki ösüşine täsir edýän faktorlary öwrenip, kosmosda uzak möhletläp ýaşalanda ýüzbe-ýüz bolunjak kynçylyklary we meseleleri çözüp biljekdigimize umyt baglaýarys" diýip, Ýuý Lesýan aýtdy.
Bu tejribede iki model ulanylýar: biri ýatgy öýjüklerine, beýlekisi bolsa mikrofluidik çipde ýerleşdirilýär. Şeýle nusgalar bir wagtyň özünde ýerüsti laboratoriýalarda hem öwrenilýär.
Bäş günlük sikl tamamlanandan soň, nusgalar orbitada doňdurylyp, ýerüsti ylmy-barlagyň netijeleri bilen deňeşdirme seljermesini geçirmek üçin Ýere ugradylar.
