Günorta Koreýanyň Goranmak ministrligi harby gullukçylaryň sanynyň azalmagy sebäpli, goşunda robototehnikany ornaşdyrmak üçin Hyundai Motor kompaniýasy bilen hyzmatdaşlyk etmegiň ugruna çykdy.
Bloomberg agentliginiň habar bermegine görä, Günorta Koreýanyň häkimiýetleri şahsy düzümiň ýetmezçiligi meselesini çözmek üçin uçuşsyz ulgamlary we emeli aň esasyndaky tehnologiýalary ulanmagy göz öňünde tutýar. Harby edara Hyundai bilen gepleşikleriň «ýokary tehnologiýaly, ylma esaslanýan ýaragly güýçleri» döretmek ugrunyň çäklerinde alnyp barylýandygyny mälim etdi.
Robototehnikanyň ilki bilen söweşjeň bolmadyk wezipelerde – gözegçilik, aňtaw we logistika işlerinde ulanylmagyna garaşylýar. Göz öňünde tutulýan modelleriň arasynda Boston Dynamics kompaniýasynyň Spot dört aýakly roboty, MobED Mobil platformasy we esgerler üçin niýetlenen, egne geýilýän X-ble Shoulder ekzoystyhan ulgamy bar.
Häzirki wagtda hyzmatdaşlygyň anyk şertleri ylalaşylmadyk. Hyundai kompaniýasynyň wekili hem bu mesele boýunça teswir bermekden saklandy.
