Illinoýs ştatynyň ýaşaýjysy, amerikaly kolleksioner Deniel Park dünýäde iň köp «Bearbrick» şekiljiklerini ýygnap, adyny Ginnesiň rekordlar kitabyna ýazdyrdy.
Täze rekordçynyň elinde 3 482 sany şekiljik bar. Bu görkeziji hytaýly kolleksioner Gao Ke tarapyndan 2020-nji ýylda goýlan öňki rekorddan (1 008 şekil) üç esse köpdür.
Bearbrick şekiljikleri 2001-nji ýylda ýapon dizaýneri Tatsuhiko Akaşi tarapyndan «Plýuş aýyjygynyň» (Teddy Bear) 100 ýyllygy mynasybetli ýadygärlik sowgat hökmünde döredildi. Soňra bu şekiljikler häzirki zaman sungatynyň, köçe sungatynyň we kolleksiýa dizaýnynyň bir bölegine öwrüldi. Olar dünýä belli brendler, suratkeşler we sazandalar bilen hyzmatdaşlykda çykarylýar.
Parkyň bu kolleksiýany ýygnap başlanyna bary-ýogy bäş ýyl boldy. Hemme zat onuň bir sany «belgisiz» gutyny satyn almagy bilen başlandy. Wagtyň geçmegi bilen, onuň öýündäki iş otagy dürli görnüşdäki we ölçegdäki şekiljiklerden doly sergi meýdançasyna öwrüldi.
Onuň kolleksiýasynda Žan-Mişel Baskia, Endi Uorhol we Kit Haringiň ýaly suratkeşleriň işleriniň äheňindäki şekiljikler, şeýle-de Lebron Jems, Hello Kitti, Mikki Maus, Ninja pyşbagalary we hatda «13-indäki anna» («Пятница, 13-е») gorkunç filminiň gahrymanynyň keşpleri-de bar.
Deniel Parkbu toplumyndaky şekiljiklere: «Bu hemmeleriň tanaýan nusgawy keşbini saklap, çäksiz döredijilik görkezmäge mümkinçilik berýän ajaýyp serişdedir» diýip baha berýär.
Onuň aýtmagyna görä, rekord goýmak baradaky pikir onuň sekiz ýaşly gyzynyň «Ginnesiň rekordlar kitabyna şeýdip giren barmyka?» diýen soragyndan soň döräpdir.
