adidas kompaniýasy ABŞ-da, Kanadada we Meksikada geçiriljek 2026-njy ýylyň dünýä çempionatyna bagyşlanan «Backyard Legends» atly gysga metražly filmini hödürledi.
Wideoda baş keşbi aktýor Timoti Şalame ýerine ýetirdi. Sýužet boýunça ol «Real Madridiň» ýyldyzy Jud Bellingemden, «Barselonanyň» ýaş zehini Lamin Ýamaldan we zenan futbolçy Triniti Rodmandan ybarat topary ýygnaýar. Olar ýeňliş diýen zady bilmeýän köçe toparyna garşy oýnamaly bolar.
Filmde Lionel Messi, Rafinýa, Pedri, Florian Wirs, Usman Dembele, Santýago Himenes we repçi Bad Bunny ýaly meşhur şahsyýetler hem epizodik keşplerde peýda bolýar. Mundan başga-da, wideoda Zinedin Zidanyň, Alessandro del Pýeronyň we Dewid Bekhemiň keşpleri bar.
Taslamanyň režissýory awstraliýaly Mark Molloý boldy.
«Öňler men bu ýigitler bilen bäsleşmegi arzuw ederdim. Bilýärsiňizmi, çagalygymda "Pirs 40" meýdançasynda oýnanymda Bekhemiň jerime urgulary, del Pýeronyň gollary we Zidanyň urgulary barada pikir edip, öz usulymda olary gaýtalardym. Men bu oýny örän gowy görýärin, şonuň üçin dünýäniň iň gowy netijelerini göz öňünde tutup döredilen adidas brendi bilen şeýle taslama gatnaşmak meniň üçin diýseň üýtgeşik» – diýip, Şalame gürrüň berdi.
DÇ-2026 11-nji iýun — 19-njy iýul aralygynda taryhda ilkinji gezek birbada üç ýurtda geçiriler.
