Kolumbiýaly aýdymçy Şakira ABŞ-da, Kanadada we Meksikada geçiriljek 2026-njy ýylyň dünýä çempionaty üçin «Dai Dai» atly aýdymyny hödürledi. Aýdymdan bölek onuň resmi YouTube sahypasynda ýerleşdirildi.
Şakira bu aýdymy nigeriýaly aýdymçy Burna Boy bilen bilelikde ýerine ýetirdi. Aýdymyň wideosy Braziliýanyň Rio-de-Žaneýro şäherindäki «Marakana» stadionynda düşürildi. Onuň doly premýerasy 14-nji maýda bolar.
Mundan ozal Şakira 2010-njy we 2014-nji ýyllarda Günorta Afrika Respublikasynda we Braziliýada geçirilen dünýä çempionatlary üçin aýdym çykarypdy. Şonda onuň «Waka Waka» we «La La La» atly kompozisiýalary ýaryşlaryň resmi senalaryna öwrülip, örän meşhur boldy.
2026-njy ýylyň dünýä çempionaty 11-nji iýun — 19-njy iýul aralygynda üç ýurduň çäginde 48 toparyň gatnaşmagynda geçiriler.
