Palo-Alto şäherinde ýerleşýän Sabi startapy beýni signallaryny okap we pikirleri tekste öwrüp bilýän örülen başgabyň işlenip düzülendigini yglan etdi.
New Atlas neşiriniň habar bermegine görä, Sabi Cap atly enjam takmynan 100 000 elektroensefalografiýa (EEG) sensorlary bilen üpjün edilen. Olar beýniniň elektrik işjeňligini ýazga alýar we maglumatlary kompaniýanyň Brain Foundation atly AI modeline geçirýär. Işläp düzüjileriň tassyklamagyna görä, ulgam pikirleri minutda 30 söze çenli tizlikde sanly tekste öwrüp bilýär.
Wired neşiriniň habaryna görä, model takmynan 100 meýletinçiden ýygnalan 100 000 sagatlyk maglumatlar esasynda taýýarlanyldy. Şeýle-de bolsa, bilermenler EEG signallaryny söze öwrüp bilýän uniwersal ulgamy döretmegiň örän kyn mesele bolup galýandygyny we kompaniýanyň heniz tehnologiýanyň netijeliliginiň ynamly subutnamasyny hödürlemändigini belleýärler.
Şeýle enjamlara bolan gyzyklanma olaryň Neuralink ýaly beýni implantlaryna has ýönekeý alternatiwa bolmagynyň mümkindigi bilen baglydyr. Käbir barlaglar EEG maglumatlarynyň "pikirden tekste" tehnologiýalary üçin ulanylyp bilinjekdigini görkezýär.
Şeýle-de bolsa, Scientific Reports žurnalynda çap edilen makalanyň awtorlary şeýle modelleriň netijeleriniň ikuçly bolmagynda galýandygyny belleýärler. Olar üstünligiň käbir böleginiň doly "pikir okamak" däl-de, emeli aňyň nusgalary ýatda saklamak ukyby bilen baglanyşykly bolmagynyň mümkindigine ynanýarlar.
Sabi enjamyny 2026-njy ýylyň ahyrynda çykarmak meýilleşdirilýär.
