Dünýäde dogluşyň derejesi babatda sebitleriň arasyndaky tapawut barha artýar. Muňa BMG-niň täze infografikasynda görkezilen "Dünýäde ýurtlaryň ilatynyň geljegine täzeden syn" atly maglumaty şaýatlyk edýär.
Grafikde dünýäniň iň uly sebitleri boýunça ilatyň sanyny, şeýle hem olaryň ýönekeý ilat çalşygynyň derejesine gatnaşygyny - her aýala 2,1 çagadan düşýändigini hasaba almak bilen, dogluşyň umumy koeffisiýenti görkezilýär.
Iň ýokary görkeziji Afrikada hasaba alyndy - her aýala dört çagadan düşýär. Bu dünýä boýunça ortaça 2,2 çagadan iki esse köp we Ýewropa boýunça ortaça 1,4 çagadan üç esse ýokarydyr. Bilermenler geljekki onýyllyklarda Afrikanyň dünýä ilatynyň ösüşiniň uly bölegini düzjekdigini çaklaýarlar.
Beýleki köp sebitlerde dogluşyň derejesi eýýäm nesliň üznüksiz döräp duruş derejesinden aşak düşdi. Aziýada, Demirgazyk we Günorta Amerikada bu görkeziji her aýala takmynan 1,7 çagadan, Ýewropada bolsa 1,4 çagadan düşýär.
Bilermenler dogluşyň ýokary derejesini ilatyň ýaşlygy, şäherleşmegiň azlygy hem-de bilim we saglygy goraýyş hyzmatlaryna elýeterlilikdäki tapawutlar bilen baglanyşdyrýarlar. Pes derejeler bolsa, tersine, ilatyň garraýandygyny we geljekde zähmet bazaryna basyş bolmagynyň mümkindigini görkezýär. Şeýle şertlerde immigrasiýa we maşgala goldaw maksatnamalary barha möhümleşýär.
