Ýewropada robotlaryň we emeli aňyň kömegi bilen deňiz düýbüni arassalamaga niýetlenen SeaClear 2.0 ulgamynyň synaglary başlandy.
Häzirki bar bolan çözgütlerden tapawutlylykda, bu taslama eýýäm deňiz düýbüne çöken hapalary ýygnamaga gönükdirilendir. Wagtyň geçmegi bilen beýle galyndylar dargap, mikroplastige öwrülýär. Mikroplastigi aýyrmak bolsa asla mümkin däl diýen ýaly we ol ähli ekoulgamlara ýaýraýar.
Ulgam bilelikde işleýän birnäçe enjamdan ybarat: adamsyz gämi tutuş operasiýany dolandyrýar, howa arkaly dron hapalaryň jemlenen ýerlerini kesgitleýär, suwasty apparat bolsa düýbi skanirläp, obýektleri tapýar. Hapalary ýygnamak üçin dürli robotlar ulanylýar. Olaryň käbiri dar ýerlerde işläp, ýeňil hapalary ýygnaýar, beýlekileri bolsa ýörite gysgyçlaryň kömegi bilen agyr zatlary ýokary galdyrýar.
Emeli aň kameralardan we sonarlardan gelýän maglumatlary işläp taýýarlap, hapany tebigy obýektlerden saýhallamaga kömek edýär. Şunlukda, ähli proses ynsan tarapyndan gözegçilikde saklanylýar.
Synagyň dowamynda eýýäm awtoulag tekerlerini, metal gurluşlary we gämileriň detallaryny suwdan çykarmak başartdy.
Ulgam kämilleşdirilenden soňra onuň netijeliligi ýokarlandy: 30–40 minudyň içinde belli bir meýdançany barlap, arassalamak, bir sagatdan az wagtyň içinde bolsa iri göwrümli obýektleri ýokary galdyrmak mümkin boldy.
Synaglar Wenesiýada, Dubrownikde we Tarragonada dowam eder. Taslamany 2026-njy ýylyň ahyryna çenli tamamlamak meýilleşdirilýär.
