Norwegiýanyň 1X Technologies startapy Kaliforniýa ştatynyň Heýword şäherinde «Neo» atly gumanoid (adampisint) robotlary öndürýän zawodyny açdy.
Kompaniýa kärhananyň işläp başlan ilkinji ýylynda 10 müňe golaý enjam öndürmegi, 2027-nji ýylyň ahyryna çenli bolsa bu sany ýylda 100 müň robota ýetirmegi meýilleşdirýär.
Zawodyň meýdany takmynan 5400 inedördül metre deň bolup, onuň gurluşygy birnäçe aý dowam etdi. Şol bir wagtyň özünde, San-Karlosda mundan hem uly bolan ýene bir desganyň gurluşygy tamamlanyp barýar.
«Neo» roboty eýýäm 20 müň dollar bahasy bilen deslapky sargytlar üçin elýeterlidir. Ýumşak örtükli bu robot öý işlerine kömek etmek üçin niýetlenendir. Ol eşikleri epläp, öýi ýygnap we adamlar bilen aragatnaşyk saklap bilýär.
Wagtyň geçmegi bilen robot täze ukyplary öwrenmäge-de ukyply. Geljekde bu enjamlaryň garry adamlara ideg edip bilmegine-de garaşylýar.
«Neo» robotlarynyň ilkinji tapgyrlary şu ýylyň ahyryna çenli eýelerine gowşurylar diýlip söz berilýär. Kompaniýa has giň meýdança gözläp, öz ştab-kwartirasyny Norwegiýadan Kaliforniýa göçürdi.
1X kompaniýasy häzirki wagta çenli 123,5 million dollar maýa goýumyny çekdi. Onuň esasy maýadarlarynyň biri bolan EQT Ventures özüne degişli kompaniýalarda 10 müňe golaý roboty ulanmagy meýilleşdirýär.
Startap motorlardan başlap, elektronika we batareýalara çenli ähli esasy şaýlary öz zawodynda öndürmegi niýet edinýär. Bu bolsa täze çözgütleri çalt girizmäge we enjamyň hiline gözegçilik etmäge mümkinçilik döredýär. Taslamanyň awtorlarynyň çaklamasyna görä, ýakyn ýyllarda önümçilikdäki adampisint robotlaryň sany adamlaryň sany bilen deňleşip biler.
