Biologlaryň halkara topary şäher guşlarynyň adamlary jynsyna görä kabul edýändigini anykladylar. Şoňa görä, guşlar aýallara has atiýaçly çemeleşýärler we erkeklere garanyňda, olaryň özlerinden daşrakda duranlaryny kem görmeýärler.
Barlaglar Çehiýada, Fransiýada, Germaniýada, Polşada we Ispaniýada geçirildi. Şäher seýilgählerinde boýlary deň we meňzeş geýnen erkekler we aýallar gönümel guşlara tarap ýörediler. Alymlar guşlaryň haýsy aralykda uçup gidýändigini, ýagny «uçuşyň başlanma aralygyny» ölçediler.
Netijede ortaça hasap bilen, guşlar erkekleri aýallara garanyňda takmynan bir metr has golaýa goýberdiler. Bu görkeziji öwrenilen guşlaryň 37 görnüşiniň (serçeler, garaguşlar, gumrular, saýrak guşlar we beýlekiler) hemmesi üçin tassyklanyldy.
Barlagda jemi 2701 sany ölçeg işi geçirildi we netijeler People and Nature žurnalynda çap edildi.
Los-Anjelesdäki Kaliforniýa uniwersitetiniň professory Daniel Blümşteýn bu maglumatlara ynanýandygyny, emma muny häzirlikçe düşnükli teswirläp bilmeýändigini aýtdy. Onuň sözlerine görä, netijeler dürli şäherlerde we dürli guş görnüşlerinde meňzeş bolup çykdy.
Doktor Ýanina Benedetti hem bu netijelere geň galandygyny aýdýar. Onuň pikiriçe, barlag haýwanlaryň adamlary jynsyna görä saýgarýandygyny aýdyň görkezýär. Munuň sebäpleri hökmünde yslar (feromonlar), ýöreýiş aýratynlyklary ýa-da beden gurluşy ýaly çaklamalar öňe sürülýär. Ýöne bular hem entek diňe gipotezalygyna galýar.
Doktor Federiko Morelli-de öz gezeginde bu täsin hadysanyň häzirlikçe ylmy düşündirişiniň ýokdugyny nygtaýar. Alymlar guşlaryň anyk haýsy signallary kabul edýändigini we saýgarýandygyny bilmek üçin barlaglary dowam etdirmegi meýilleşdirýärler.
