Ýaponiýaly boksçy Naoýa Inoue Tokioda watandaşy Dzýunto Nakatanini ýeňip, ikinji ýeňil agramda (55,22 kg çenli) dünýäniň absolýut çempiony adyny gorady.
Tutluşyk tutuş 12 raundlap dowam etdi. Söweşiň netijesi boýunça eminler biragyzdan ýeňşi Inouä berdi. Bu onuň üçin häzirki agram derejesinde absolýut çempionlyk adyny eýýäm ýedinji gezek üstünlikli goramagydyr.
33 ýaşly Inoue Bütindünýä boks geňeşiniň (WBC), Bütindünýä boks guramasynyň (WBO), Halkara boks federasiýasynyň (IBF) we Bütindünýä boks assosiasiýasynyň (WBA) çempionlyk guşaklaryna eýelik edýär. Ol professional ringde 33 ýeňiş gazanyp, ýeke gezek hem ýeňilmedi.
28 ýaşly Nakatani üçin bolsa bu ýeňliş karýerasynda ilkinji boldy. Mundan ozal onuň hasabynda 32 ýeňiş bardy.
Ýatlap geçsek, Inoue mundan ozal ýeňil agramda (53,52 kg çenli) hem dünýäniň absolýut çempiony bolupdy. Şeýle hem, ol birinji iň ýeňil agramda (48,99 kg çenli) we ikinji iň ýeňil agramda (52,16 kg çenli) çempionlyk adyny alypdy.
