Moldowanyň Aneniý-Noý raýonynyň Delakeu obasynda türkmen ýazyjysy we uruş gahrymany Nurmyrat Saryhanowyň ýadygärligine gül goýmak dabarasy geçirildi.
Çärä Türkmenistanyň Moldowadaky ilçisi (oturýan ýeri Kiýew) Toýly Ataýew, Aneniý-Noý raýonynyň başlygy Aleksandru Moiseý, raýon geňeşiniň wekilleri, jemgyýetçilik işgärleri, mekdep okuwçylary we ýerli ýaşaýjylar gatnaşdy.
Dabara gatnaşyjylar 1944-nji ýylyň 4-nji maýynda Moldowa ýerlerini faşistik basybalyjylardan azat etmek ugrundaky söweşlerde wepat bolan ýazyjyny hatyralady.
2026-njy ýylda Nurmyrat Saryhanowyň doglan gününiň 120 ýyllygy bellenilýär. «Şükür bagşy» powestiniň we «Kitap» hekaýasynyň awtory 1906-njy ýylda Gökdepe etrabynyň Yzgant obasynda dünýä inipdi.
Ikinji jahan urşunyň esgerleriniň doganlyk guburynyň ýerleşýän Delakeu obasyndaky ýadygärlik Türkmenistanyň Halk Maslahatynyň Başlygy Gurbanguly Berdimuhamedowyň başlangyjy bilen düýpli abatlandy. Abatlaýyş işleri Moldowanyň ýolbaşçylarynyň goldamagynda we türkmen tarapynyň hasabyna amala aşyryldy. Täzelenen ýadygärlik toplumy 2017-nji ýylda Moldowanyň Prezidentiniň we türkmen wekiliýetiniň gatnaşmagynda açyldy.
