Täze Zelandiýanyň paýtagty Wellingtonda bir asyrdan gowrak wagt mundan ozal by ýerlerden ýitirim bolan kiwi guşlaryny yzyna getirmek boýunça uly maksatnama amala aşyrylýar. Bu taslamanyň çäginde sebitiň tebigy gurşawyna eýýäm 250-nji guş goýberildi.
Guşlar tebigata goýberilmezinden öň, parlament binasynyň dabaraly zalynda görkezildi. Ol ýerde deputatlar we mekdep okuwçylary seýrek guşlary ýakyndan synlamaga mümkinçilik tapdylar.
Kiwileri ýyrtyjy haýwanlardan goramak üçin 24 müň gektar meýdanda 5 müňden gowrak duzak gurnaldy. Şonuň netijesinde, kiçijek jüýjeleriň diri galmak mümkinçiligi 90%-e çenli ýokarlandy.
Taslamany esaslandyryjy Pol Worduň aýtmagyna görä, kiwiler Täze Zelandiýanyň milli nyşanydyr we olaryň paýtagtyň töwereginden ýitip gitmegi örän ýakymsyz hadysadyr.
Öňler Täze Zelandiýada 12 milliona golaý kiwi ýaşan bolsa, häzir olar azalyp, bary-ýogy 70 müňe ýetdi.
Täze taslama ýurtdaky ýyrtyjy haýwanlary 2050-nji ýyla çenli doly ýok etmek baradaky milli strategiýanyň bir bölegidir. Bu başlangyç arkaly Wellingtonyň düz baýyrlary ýene-de öz asyl eýeleri bolan uçmaýan kiwi guşlaryna gowuşdy.
