Halkara futbol federasiýasy (FIFA) 2026-njy ýylda geçiriljek dünýä çempionatynyň baýrak gaznasyny 15% artdyryp, tölegleriň umumy möçberini 871 million dollara ýetirmek barada çözgüt kabul etdi.
Wankuwerde geçirilen guramanyň geňeşinde tassyklanan täze maliýe meýilnamasyna görä, gatnaşýan 48 ýygyndy toparyň her biri üçin iň pes töleg öň meýilleşdirilen 10,5 million dollaryň deregine indi 12,5 million dollar bolar.
Býujetiň täzeden gözden geçirilmegi erkekleriň arasyndaky ýaryşyň täjirçilik taýdan üstünlikli bolmagy hem-de milli assosiasiýalaryň uly logistika we salgyt çykdajylarynyň öwezini dolmak zerurlygy bilen baglanyşyklydyr. Mundan ozal Ýewropanyň köp sanly federasiýalary ABŞ-da, Kanadada we Meksikada bolmagyň hem-de ýol çykdajylarynyň gymmatlygy sebäpli, hatda üstünlikli çykyş edilen ýagdaýynda-da ýaryşa gatnaşmagyň maliýe taýdan ýitgili bolup biljekdigi barada alada bildiripdi.
Esasy baýrak pulundan başga-da, FIFA toparlaryň taýýarlygy üçin berilýän serişdäni 1,5 million dollardan 2,5 million dollara çenli, kwalifikasiýa tölegini bolsa 10 million dollara çenli ýokarlandyrdy. Mundan başga-da, wekiliýetleriň çykdajylaryny ýapmak we bilet kwotalaryny giňeltmek üçin 16 million dollardan gowrak goşmaça serişde bölüp berildi. Ýaryşdan geljek galan girdejiler bolsa, adatça bolşy ýaly, dünýä futbolyny ösdürmek üçin FIFA-nyň agzasy bolan 211 assosiasiýanyň arasynda paýlanar.
2026-njy ýylyň dünýä çempionaty taryhy waka bolar: ýaryş ilkinji gezek bir wagtyň özünde üç ýurtda — ABŞ-da, Kanadada we Meksikada geçiriler. Ýaryşlar 11-nji iýun bilen 19-njy iýul aralygynda dowam eder, oňa gatnaşjak toparlaryň sany bolsa taryhda ilkinji gezek 48-e ýetirildi.
