Marokkoda «Mohammed VI Tower» diýlip atlandyrylýan 250 metr beýiklikdäki täze bina gurlup gutaryldy. Bu gökdirän daşky görnüşi bilen, edil uçuş meýdançasynda duran raketany ýatladýar.
Paýtagt şäher Rabatyň golaýynda ýerleşýän we ýurduň şasynyň adyny göterýän bu bina, resmi taýdan Marokkonyň iň beýik, Afrika yklymynyň bolsa ikinji iň beýik ymaraty boldy.
Äpet taslamanyň taryhy örän gyzykly. «Afrika bankynyň» ýolbaşçysy, telekeçi Otman Benjellun 1960-njy ýyllaryň ahyrynda NASA-nyň merkezine baryp, Apollo 12 missiýasyna taýýarlanýan Saturn V raketasyny görenden soň, şeýle täsin görnüşli bina gurmagy meýilleşdirýär.
Maýa goýumy takmynan 700 million dollara barabar bolan binanyň gurluşygyna 8 ýyl sarp edildi. Desga diňe bir owadanlykda däl, eýsem, inženerçilik taýdan hem kämildigi bilen saýlanýar. Günorta tarapy Gün panelleri, demirgazyk tarapy aýna bilen örtülen ymarat, ýagyş suwlaryny ýygnamak ulgamy arkaly halkara LEED Gold ekologiýa standartyna hem laýyk gelýär.
Gökdiräniň düýbi 60 metr çuňluga gidýär. Güýçli ýellerde yranmazlygy üçin, onuň depesinde ýörite maýatnikli dempfer gurnaldy.
Elli bäş gatly bu binanyň umumy meýdany 102 müň inedördül metrden gowrak bolup, onda ofisler we kaşaň apartamentler, lýuks myhmanhana, şäheriň panorama görnüşini synlamak üçin ýörite meýdança bar. Şeýle-de onda gelen-gidenleri gatnatmak üçin 36 sany lift gurnalan.
Taslamanyň baş potratçysy hökmünde dünýäniň iň beýik binasy bolan Burj-Halifany guran BESIX kompaniýasy çykyş etdi.
