Bergili bolmagy hiç kim hem islemeýär. Çünki bergi adamyň howuny peseldip, öz içinde dowamly alada, beýlekileriň öňünde bolsa utanç duýgusyny döredýär. Şeýlelikde negözel durmuşyň lezzeti-de kemelýär. Emma bergi doly üzülenden soňky ýagdaý hem o diýen hezil däl ýaly...
Bu barada psiholog Maksim Sotnik «sb.by» neşirine beren interwýusynda aýratyn düşündirýär.
Onuň sözlerine görä, bergiden dynmak duýgusy bilen bir hatarda, adamyň kalbynda boşluk peýda bolýar. «Garaşylyşy ýaly, bergi üzülenden soňra erkinlik we ýeňillik duýgusy gelýär, emma paradoks hem şunda: uzak wagtlap adamyň durmuşy diňe bir maksadyň – bergiden dynmagyň töwereginde guraldy.
Indi bolsa şol basyş aýryldy welin, adamyň ýol görkezijileri-de ýitdi. Onda öz-özünden «Indi näme etmeli?» diýen sowal döreýär hem-de ozal üns bermedik agyr ýadawlyga üstüni basdyrýar» diýip, psiholog belleýär.
Bergiň gutarmagy diňe bir maliýe meselesiniň çözülmegi däl-de, eýsem, täze bir tapgyryň başlangyjydyr. Bu jogapkärli döwürde adam özüne bolan garaýşyny täzelemeli we bolan ýagdaýlardan dogry netije çykarmaly. Ýagny, oňa, ilkinji nobatda, bergililik sebäpli bozulan ynamlary dikeltmek we indi bergä çümmez ýaly täze maliýe endiklerini edinmek gerek.
Adam şeýdip, ýuwaş-ýuwaşdan öz öňki gyzyklanmalaryna we meýilnamalaryna dolanmaly.
Psihologyň aýtmagyna görä, bergi meselesinden akylly-başly çykan adamlar durmuşda has durnukly bolýarlar. Çünki bu kynçylyk olar üçin uly durmuş tejribesine we täze ösüş nokadyna öwrülýär. Sebäbi bergi üzmek – bu hekaýatyň soňy däl-de, täze we has gowy durmuşyň başlangyjydyr.
