27–29-njy aprel aralygynda Ýaponiýanyň paýtagty Tokio şäherinde geçirilen “SusHi Tech Tokyo 2026” halkara innowasion forumyna Türkmenistanyň Aragatnaşyk ministrliginiň wekillerinden ybarat wekiliýet gatnaşdy. Bu barada Türkmenistanyň DIM-i habar berýär.
Dünýäniň dürli ýurtlaryndan kompaniýalary, startaplary we tehnologiýa hünärmenlerini birleşdiren bu forumyň esasy maksady täze sanly çözgütleri görkezmekden we halkara hyzmatdaşlygy ösdürmekden ybarat boldy. Çäräniň dowamynda emeli aň (AI), 5G we 6G aragatnaşyk ulgamlary, akylly şäher (Smart City), ýaşyl energiýa hem-de sanly ykdysadyýet ýaly möhüm ugurlar boýunça ýörite çykyşlar we sergiler guraldy.
Forumyň çäklerinde türkmen wekiliýeti tehnologiýa we sanly ösüş ugurlarynda öňdebaryjy birnäçe daşary ýurt kompaniýalarynyň wekilleri bilen iş duşuşyklaryny geçirdi.
Gepleşikleriň dowamynda sanly infrastrukturany ösdürmek, telekommunikasiýa hyzmatdaşlygyny ýola goýmak, emeli aň we şäher dolandyryşynda akylly çözgütleri ulanmak meseleleri ara alnyp maslahatlaşyldy. Şeýle hem taraplar halkara startap platformalary bilen hyzmatdaşlyk etmek arkaly ýaş startaplary goldamagyň we geljekde bilelikdäki innowasion taslamalary amala aşyrmagyň mümkinçiliklerini öwrendi.
