29-njy aprelde Londonyň taryhy merkezindäki Waterloo meýdançasynda täze bir heýkel peýda boldy. Onuň sütüninde dünýä belli anonim köçe suratkeşi Benksiniň goly goýlupdyr.
Sungat eserinde balak-penjekli bir adam şekillendirilýär. Onuň elindäki pasyrdaýan baýdagy kellesiniň üstüne düşüp, gahrymanyň ýüzüni bütinleý ýapýar we oňa «ýüzsüz» häsiýeti berýär. Nätanyş şahsyýet sütüniniň gyrasyndan öňe ädim ädýär. Bu görnüş, onuň öňüni görmeýändigi sebäpli, edil häzir gorpa gaçjak ýaly täsir galdyrýar.
Suratkeş entek bu işi özüniň sosial ulgamlarynda resmi taýdan tassyklamady. Emma eseriň syýasy satirasy we jemgyýete gönükdirilen göni habary bada-bat Benksiniň özboluşly döredijilik stilini ýadyňa salýar.
Bu täze eser şol töwerekdäki döwlet we harby işgärleriniň adaty, dabaraly ýadygärliklerine garşy goýlan özboluşly bir tankyt ýalydyr.
Gyzykly heýkel Reuters agentliginiň Benksiniň hakyky ady baradaky derňewinden kän wagt geçmänkä peýda boldy. Žurnalistleriň çaklamasyna görä, «Benksi» lakamynyň aňrysynda Robin Ganningem durýar. Maglumatlara görä, ol 2000-nji ýyllaryň ahyrynda anonimligini gorap saklamak üçin adyny we familiýasyny Britaniýada iň köp duş gelýän atlaryň biri bolan Dewid Jons adyna üýtgedipdir.
