Geljek aý Nýu-Ýorkda geçiriljek «Christie's» auksionynda Roý Lihtenşteýniň meşhur «Howsalaly gyz» («Тревожная девушка») atly eseri satuwa çykarylar we onuň bahasynyň 60 million dollara çenli ýetmegine garaşylýar.
Suratkeşiň karýerasynyň iň güllän döwürleri, ýagny 1964-nji ýylda döredilen bu seýrek eser 30 ýyldan gowrak wagtlap hususy kolleksiýada saklanyp, köpçülige görkezilmän gelipdi. Söwdalaşyk 18-nji maýda «XX asyryň sungaty» atly agşamky auksionyň dowamynda bolar.
Awtoryň meşhur «Gyzlar» bölümine degişli bolan bu eserde, keşbi DC-niň «Girls' Romances» komiksinden alnan sary saçly ýaş zenan maşgala şekillendirilýär. Lihtenşteýn bu keşbi täzeden işläp, ýönekeý elementleriň – çyzyklaryň, reňkiň we şekiliň üsti bilen çuňňur ynsan duýgularyny bermäge çalşypdyr. «Christie's-iň» wekili Sara Fridlander eseri «pop-portretiň iň kämil nusgasy» diýip atlandyrdy we suratkeşiň gazet çapyna öýkünýän özboluşly «Ben-Deý nokatlary» stilini aýratyn ýatlady.
Hakykatdan hem Lihtenşteýniň 1961-nji ýylda başlan bu döredijilik ýoly şu güne çenli plagiat we sungat göçürmesiniň arasyndaky araçäk baradaky jedelleri döretse-de, onuň eserleri bazarda iň geçginli harytlaryň biri bolup galýar.
Ýatladyp geçsek, Lihtenşteýniň işleri yzygiderli bahalar boýunça rekord goýýar: 2017-nji ýylda onuň «Masterpiece» eseri 165 million dollara satylypdy. «Gyzlar» bölümi bolsa on ýyldan gowrak wagt bäri auksionlarda görünmedi. Bu kategoriýadan iň soňky iri satuw 2015-nji ýylda 95 million dollara geçen «Nurse» eseri bolupdy.
Şeýlelikde, öňümizdäki auksion kolleksiýaçylar üçin ussadyň iň belli işleriniň birini edinmäge uly mümkinçilik bolar.
