Toyota kompaniýasy 2025-nji maliýe ýylynyň jemleri boýunça dünýä bazarynda 10,48 million ulag satyp, soňky iki ýylyň iň ýokary görkezijisine ýetdi we öňki ýyl bilen deňeşdirilende satuwy 2% artdyrdy. Şol bir wagtyň özünde global önümçilik hem 2,2% ösüş bilen 9,89 million birlige barabar boldy.
Ýaponiýanyň içerki bazarynda satuwlar 2% peselip, 1,47 million awtoulag görkezijisinde saklanan bolsa, ýurduň daşynda tersine, 2,7% ösüş hasaba alyndy we rekord derejädäki 9 million awtoulag satyldy.
Aýratyn-da ABŞ-da isleg 7,7% ýokarlanyp, satuwlar 2,52 milliona ýetdi; bu ýerde Corolla we Camry modelleri iň köp isleg bildirilýän ulaglar boldy. Hytaý bazarynda bolsa ýerli öndürijileriň bäsdeşligi sebäpli satuwlar 1,4% peselip, 1,76 milliona düşdi. Şeýle hem, sebitdäki durnuksyzlyk sebäpli mart aýynda Ýakyn Gündogara eksportyň 46,4% peselendigi bellenilýär.
Elektrikleşdirilen awtoulaglaryň satuwy 1,5% ösüp, 4,8 million birlige ýetdi. Kompaniýanyň daşary ýurtlardaky kärhanalary jemi 6,66 million awtoulag öndürdi, bu bolsa öňki ýylkydan 2,3% köpdür. Hususan-da, ABŞ-da önümçilik kuwwaty 11,4% ýokarlanyp, 1,39 million awtoulaga deň boldy.
