Sony kompaniýasy Aziýanyň käbir bazarlarynda «PlayStation 5» oýun konsollarynyň bahalaryny gymmatlatjakdygyny yglan etdi. WCCFTech neşiriniň habar bermegine görä, bu üýtgeşmeler 1-nji maýdan başlap güýje girdi we Günorta Koreýa, Singapur, Malaýziýa, Tailand, Indoneziýa, Filippinler hem-de Wýetnam ýaly ýurtlara täsir eder.
Kompaniýa bu karary global ykdysady ýagdaý, walýuta nyrhlarynyň üýtgemegi we önümçilik çykdajylarynyň artmagy bilen düşündirdi.
Täze bahalar takmynan Günorta Koreýada diskli PS5 – $693, sanly (digital) – $627, PS5 Pro – $949, Singapurda degişlilikde $629, $566 we $864, Indoneziýada standart görnüşi $700, sanly görnüşi bolsa $614 bolar.
Şeýle hem el terminaly bolan PlayStation Portal hem gymmatlar. Täze bahalar Günorta Koreýada $276, Singapurda $257, Malaýziýada $247, Tailandda $231 we Indoneziýada $319 bolar.
Mundan ozal hem şeýle gymmatlamalar Demirgazyk Amerikada, Ýewropada, Ýaponiýada we Braziliýada bolup geçipdi. 2020-nji ýylyň güýzünde, satuwa çykan pursatynda ABŞ-da PS5-iň esasy görnüşi 499 dollar, diskiz görnüşi bolsa 399 dollardy.
Aslynda, öňler oýun konsollary wagtyň geçmegi bilen arzanlaýardy. Emma häzir ýagdaý düýbünden üýtgedi. Enjamlaryň bahasy satuwa çykan wagtyndan birnäçe ýyl geçse-de, arzanlamagyň deregine ýokarlanmagy dowam edýär.
