Londonyň Patyşa kollejiniň alymlary süňk dokumasynyň emele gelmegine ýardam berýän keratin belogyndan täze material işläp düzdüler. Bu tebigy belok adaty ýüňden alynýar.
Alymlar ýüňden keratini bölüp alyp, ondan has durnukly we berk bolan ýörite gatlaklary (membranalar) ýasadylar. Gözleg ilki barlaghanada geçirildi. Onda täze material adamyň süňk öýjüklerinde synaldy. Öýjükler materiala tiz uýgunlaşyp, täze süňk gurluşlaryny emele getirip başladylar. Ondan soňra bu gatlaklar kellesinde öz-özünden bitmäge ukypsyz şikesi bolan syçanlara oturdyldy. Syçanlarda hem bary-ýogy birnäçe hepdäniň içinde täze süňk dokumasynyň ösýändigi anyklandy.
Häzirki wagtda lukmançylykda köplenç kollagene esaslanýan materiallar ulanylýar. Ýöne olar çalt dargap bilýärler we agram düşýän ýerlerde durnuklylygyny ýitirýärler. Keratin bolsa has mäkämdir we süňkleriň berk hem tertipli ösmegine şert döredýär.
Bu tehnologiýanyň ekologiýa taýdan arassalygy onuň ýene bir artykmaçlygydyr. Oba hojalygynyň galyndysy bolan ýüňüň gaýtadan dikelýän we elýeterli önümdigi täze bejergi usulynyň geljekde has arzan we köpçülikleýin bolmagyna mümkinçilik berer.
Häzirki wagtda netijeler diňe haýwanlarda subut edilen-de bolsa, alymlar bu açyşyň tiz wagtdan ynsan saglygy üçin lukmançylykda giňden ulanylyp başlanjakdygyna ynanýarlar.
