Türkmenistanyň döwlet bedenterbiýe we sport instituty «Zehinli ýaşlar — türgenleriň täze nesli» şygary astynda bedenterbiýe we sport bäsleşiklerini geçirýär. Bäsleşiklere gatnaşmaga ýurduň orta mekdepleriniň gutardyş synp okuwçylary we sport mekdeplerinde türgenleşýän höwesjeň ýaşlar çagyrylýar.
Bäsleşikleriň esasy tapgyry 2026-njy ýylyň 4 — 9-njy maýy aralygynda institutyň köpugurly sport toplumynda geçiriler.
Çäreleriň maksatnamasy birnäçe tapgyra bölünýär. 4-nji maýdan 6-njy maýa çenli umumy beden taýýarlygy we sportuň tizlik-güýç alamatly görnüşleri boýunça bäsleşikler bolar. 7-nji maýdan 9-njy maýa çenli bolsa sportuň oýun görnüşleri we göreş boýunça ýaryşlar, şeýle hem ýörite beden taýýarlygy boýunça test bäsleşikleri geçiriler. Ýaryşlar her gün sagat 14:00-dan 18:00-a çenli dowam eder.
Mundan başga-da, institutda açyk çempionatlar hem geçiriler: türkmen milli we guşakly göreş (12–14-nji maý), grek-rim we erkin göreş (15–17-nji maý) hem-de sambo (22–24-nji maý) boýunça bäsleşikler guralar.
Gatnaşmak isleýänler QR-kod ulgamy arkaly onlaýn görnüşde ýa-da degişli ýüz tutmasyny tdbsi@sanly.tm elektron salgysyna ibermek arkaly hasaba durup biler. Şeýle-de, ýaryşlar başlamazdan ozal gönüden-göni institutyň özünde hasaba aldyrmak mümkindir.
Bäsleşikleriň düzgünnamalary bilen resmi saýtdan tanşyp bilersiňiz: www.tdbsi.edu.tm
