Beýik Britaniýaly inžener-entuziast Grem Saýks bug güýji bilen işleýän motosikl gurnady. Bu täsin ulag Santa Pod ýaryş meýdançasynda geçirilen barlaglarda «dünýäniň iň çalt bugly motosikli» diýen ady almagy başardy.
«Force of Nature» («Tebigat güýji») diýlip atlandyrylýan bu baýk 1/8 mili (201 metr) bary-ýogy 3,258 sekuntda geçip, 338 km/sag tizlige ýetdi. Bu bugly motosikller üçin dünýäniň absolýut rekordydyr. Şeýle-de motosikl 1/4 mil (402 metr) 5,503 sekuntda tamamlap, 311 km/sag tizlik görkezdi. Bu görkeziji boýunça ol dünýäde diňe reaktiw motosikllerden yza galýar.
Bu ýerde adaty porşenli bug hereketlendirijisi ýok. Onuň iş maksady has ýönekeý we güýçli. Motosikliň bakynda 120 litr arassalanan suw bar. Ýaryşdan öň suw 260 °C gyzgynlyga çenli gyzdyrylýar we 50 atmosfera basyş astynda saklanýar.
Sürüji düwmä basan wagty, gyzgyn suw ýörite deşikden uly güýç bilen atylyp çykýar we şol pursatda buga öwrülip, reaktiw güýç döredýär.
Bu ulgamda «gaz bermek» diýen zat ýok, bug ýa çykýar, ýa-da çykmaýar. Motosikl başdan-aýak doly güýjünde hereket edýär.
Grem Saýks bu taslamanyň üstünde 6 ýyl töweregi işledi. Onuň indi esasy maksady – 400 metrlik aralygy 5 sekuntdan hem az wagtda geçmek.
Şeýle-de inžener bu tehnologiýanyň örän howpludygyny we adaty ýollar üçin niýetlenmändigini aýratyn belleýär. Bu gönüden-göni ýöriteleşdirilen ýaryşlar üçin niýetlenen «tekerli raketadyr».
