Milanyň «Inter» futbol klubuna Seriýa B-ä düşürilmek we gazanan kuboklaryndan mahrum edilmek ýaly berk düzgün-tertip çäreleri garaşýar diýip AGI habar berýär.
Milanyň prokuraturasy Italiýanyň eminler korpusynyň ýolbaşçysy Džanlukka Rokkiniň üstünden derňew geçirýär. Bu kişi «sport aldawçylygyna gatnaşmakda» we gerek bolan netijäni gazanmak üçin milan klubunyň oýunlaryna yzygiderli ýagdaýda özüne wepaly eminleri bellemekde güman edilýär.
Derňewiň üns merkezinde, hususan-da, 2024-nji ýylyň 8-nji ýanwarynda geçirilen «Werona» bilen bolan oýun durýar. Şol oýunda «Interiň» goragçysy Alessandro Bastoni garşydaşyny tirsegi bilen urupdy. Prokuraturanyň çaklamasyna görä, VAR eminleri «Interiň» ýeňiş getiren goluny geçiren pursadyndan öň bolan bu wakany bilkastlaýyn barlamadylar.
Eger aýyplanma subut edilse, klub 2023/2024-nji möwsümiň Seriýa A-nyň altyn medallaryndan we 2024-nji ýylyň Italiýanyň Superkubogyndan mahrum edilip bilner.
Bu ýagdaý 2006-njy ýylda bolup geçen we netijede Turin şäheriniň «Ýuwentus» klubunyň titullarynyň elinden alnyp, ýokary diwiziondan düşürilmegine getiren galmagaly ýadyňa salýar.
Derňew başlanandan soň, Džanlukka Rokki Seriýa A-nyň eminler toparynyň ýolbaşçysy wezipesinden çekildi.
