Milanyň «Inter» kluby 2025/2026 möwsüminiň Italiýanyň Kubogy ýaryşynyň final duşuşygynda Rimiň «Lasio» toparyny 2:0 hasabynda utdy. «Neradzurri» bu kubogy öz taryhynda onunjy gezek gazandy.
Bu ýeňiş arkaly «Inter» ýaryşda gazanylan titullaryň sany boýunça arassa ikinji orna çykdy. Ol bu görkeziji boýunça diňe 15 gezek ýeňiş gazanan Turiniň «Ýuwentus» klubundan yza galýar.
Final duşuşygynyň ykbaly birinji ýarymda çözüldi. Oýnuň 14-nji minutynda rimlileriň goragçysy Adam Maruşiç topy öz derwezesine girizdi, 35-nji minutda bolsa hüjümçi Lautaro Martines milanlylar üçin hasaby ikä çykaryp, duşuşygyň gutarnykly hasabyny kesgitledi.
Mundan ozal «Inter» bu kuboga 1938/1939, 1977/1978, 1981/1982, 2004/2005, 2005/2006, 2009/2010, 2010/2011, 2021/2022 we 2022/2023 möwsümlerinde mynasyp bolupdy.
Geçen möwsümde kubogy «Milan» toparyny 1:0 hasabynda utan «Bolonýa» aldy.
Toparlaryň häzirki ýaryşyň finalyna çenli geçen ýoly aňsat bolmady. Ýarym finalda «Inter» iki duşuşygyň netijesi boýunça «Komo» toparyny 3:2 hasabynda utdy. «Lasio» bolsa, öz gezeginde, esasy wagty deňme-deň tamamlanan (3:3) oýunda «Atalantany» penalti tapgyrynda (2:1) utup, finala çykmagy başardy.
