Hytaý Aýa uçuşlar üçin niýetlenen adamly kosmos gämisiniň täze neslini döretmek boýunça giň möçberli taslamany durmuşa geçirýär.
Hytaýyň kosmos ylmy we tehnikasy korporasiýasynyň bäşinji ylmy-barlag institutynyň işgäri Şao Liminiň habar bermegine görä, Pekin soňky iki ýylda adamly Aý barlag programmasyny işjeň öňe sürýär we 2030-njy ýyla çenli taýkonawtlary Aýyň üstüne gondurmagy meýilleşdirýär.
Ýurduň Merkezi telewideniýesi Şao Liminiň bu hakyndaky: «Men adamly kosmos gämisiniň täze nesliniň kosmosa uçup, taýkonawtlar üçin Ýerden daşary giňişlige uçuşlary amala aşyrmakda täze bir meýdança döretjekdigine garaşýaryn» diýen sözlerini delil getirýär. Şeýle-de hünärmen öz çykyşynda: «Ýakyn geljekde hemmeler hytaýlylaryň Aýyň üstünde öz yzlaryny galdyrandygyny görerler» diýip, bu maksada ynamly çemeleşýändiklerini-de nygtaýar.
Bu taslama uzakdan dolandyrylýan eksperimental we ylmy-barlag serişdeleriniň toplumyny öz içine alýar. Stansiýanyň gurluşygynyň 2028-nji ýylda tamamlanmagy göz öňünde tutulýar. Bu bolsa 2030-njy ýyla meýilleşdirilen adamly missiýanyň amala aşyrylmagyndan öňki iň möhüm tapgyr hasaplanýar.
