«Daily Mail» neşiriniň habar bermegine görä, emeli aň ýazylan wagtyndan 540 ýyl geçen söýgi hatynyň mazmunyny okamaga kömek etdi.
Hat 1477-nji ýylyň fewralynda Topkroftda Marjeri Brýus tarapyndan öz adaglysy Jon Pastona ýazylypdyr. Teksti okamak örän kyn boldy: ol erkin görnüşde, standart däl orfografiýa, köne sözler we gysgaltmalar bilen ýazylypdyr.
«Häzirkizaman okyjylaryna bu dil nätanyş görnüp biler, sebäbi şol döwrüň orfografiýasy, grammatikasy we aýdylyşy häzirki iňlis dilinden örän tapawutlydyr» – diýip, «MyHeritage» genealogik saýtynyň wekili düşündirýär.
Hünärmenler hatyň suratyny «Scribe AI» guralyna ýükledi, ol bolsa teksti çalt okamaga we häzirkizaman diline geçirmäge kömek etdi.
Hatdan belli bolşy ýaly, Marjeri kakasynyň galyňy artdyrmakdan ýüz döndermegi sebäpli biynjalyk bolupdyr. Muňa garamazdan, ol adaglysyny özüniň päk söýgüsine ynandyrýar we mal-döwleti az bolsa-da, ony taşlamajakdygyny ýazýar.
Bu hat 400-den gowrak resminamany öz içine alýan «Pastonlaryň hatlary» toplumyna degişlidir. Bu hat alyşmalar daýhanlykdan dörän we soňra dworýan gatlagyna çenli ýol geçen maşgalanyň sosial ýagdaýynyň üýtgeýşini görkezýär.
«Daily Mail-iň» maglumatyna görä, Marjeri Brýus bilen Jon Paston ahyrynda durmuş gurupdyr, 1479-njy ýylda bolsa olaryň ogly dünýä inipdir. Soňra «MyHeritage-iň» hünärmenleri olaryň nesillerini tapmagy başardy.
Marjeri Brýus şeýle ýazypdyr: «Eger sen meniň, nirä gitseň hem, wepaly galmagymy isleseň, men seni söýmek üçin elimde baryny ederin we seni söýmegimi hiç wagt bes etmerin. Eger-de garyndaşlarym meniň ýalňyşýandygymy aýtsalar, goý, bilsinler: ýüregim maňa seni dünýädäki ähli zatdan ýokary tutup, çyn ýürekden söýmegi buýurýar. Eger-de haçan-da bolsa aramyzda düşünişmezlik dörese, wagtyň geçmegi bilen hemme zadyň düzeljekdigine ynanýaryn. Häzir aýtmaly başga zadym ýok, diňe bir zatdan başga — seni Hudaý gorasyn. Haýyş edýärin: goý, bu hata senden başga hiç kimiň gözi düşmesin».
