«Ýylyň iň owadan ahalteke bedewi» halkara bäsleşiginiň ýeňijisi yglan edildi. «2026-njy ýylyň iň owadan ahalteke bedewi» diýen ada Türkmenistanyň Prezidentiniň Ahalteke atçylyk toplumyna degişli bolan, mele reňkli Hankerwen atly at mynasyp boldy.
Baýrak gowşurylyş dabarasy Milli bedew baýramy mynasybetli Aşgabat atçylyk sport toplumynda geçirilen dabaralaryň çäklerinde boldy.
Türkmenistanyň Prezidentiniň Buýrugyna laýyklykda, ýeňijä ak reňkli «Toyota Fortuner» kysymly ýeňil awtomobiliň açary, göçme kubok we diplom gowşuryldy.
Hankerwen 2018-nji ýylda doguldy. Ol Hanbegler bilen Okgyzyň nesli bolup, meşhur Gaplaňyň ugruna degişlidir. Şeýle hem, bu baýraga Gojameýdan, mele Meýdanly, gurt mele Pespälli, dor atlar — Edermen, Pähimli, Kerwen, gara dor Adyl, gara Mekan we gyr Merdana atly bedewler dalaş etdi.
Ýeňiji bedewiň seýsi gymmatly sowgat we atçylyk pudagyny ösdürmäge berilýän uly üns üçin döwlet Baştutanyna tüýs ýüreginden minnetdarlyk bildirdi. Ol türkmen atşynaslarynyň mundan beýläk-de pederleriň bu ugurdaky işlerini mynasyp dowam etdirjekdiklerine ynandyrdy we Türkmenistanyň Prezidentine berk jan saglyk, uzak ömür, halkyň hem-de ýurduň bähbidine alyp barýan işlerinde uly üstünlikleri arzuw etdi.
