Ministrler Kabinetiniň Başlygynyň orunbasary, daşary işler ministri R.Meredow Hökümet mejlisiniň dowamynda Türkmenistan bilen Ýaponiýanyň arasyndaky gatnaşyklary ösdürmek boýunça alnyp barylýan işler barada hasabat berdi.
Bellenilişi ýaly, şu ýylyň iýul aýynda Aşgabat şäherinde iki ýurduň daşary syýasat edaralarynyň arasynda nobatdaky syýasy geňeşmeleri geçirmek teklip edilýär. Bu çäre Prezident Serdar Berdimuhamedowyň geçen ýyl «Expo – 2025» Bütindünýä sergisinde Türkmenistanyň Milli gününiň açylyş dabarasyna we «Merkezi Aziýa – Ýaponiýa» dialogynyň ilkinji sammitine gatnaşmak üçin Ýaponiýa amala aşyran iş saparlarynyň dowamynda gazanylan ýokary derejeli ylalaşyklary durmuşa geçirmäge gönükdirilendir.
Şeýle hem ykdysady hyzmatdaşlygy çuňlaşdyrmak maksady bilen, 2026-njy ýylyň dekabrynda Tokio şäherinde Ykdysady hyzmatdaşlyk boýunça türkmen-ýapon komitetiniň nobatdaky 16-njy mejlisini geçirmek meýilleşdirilýär we bu ugurda taýýarlyk işleri alnyp barylýar. Komitetiň soňky mejlisi 2024-nji ýylyň dekabrynda Aşgabatda geçirilipdi.
