Türkmenistanyň Ministrler Kabinetiniň Başlygynyň orunbasary, daşary işler ministri Raşid Meredow anna güni geçirilen Hökümet mejlisiniň dowamynda türkmen-koreý gatnaşyklary we bu ugurda alnyp barylýan işler barada hasabat berdi. Bu barada «Watan» habarlar gepleşiginde habar berildi.
Hasabatda bellenilişi ýaly, şu ýylyň sentýabr aýynda Seul şäherinde «Merkezi Aziýa – Koreýa Respublikasy» birinji sammitiniň geçirilmegi meýilleşdirilýär. Şunuň bilen baglylykda, häzirki wagtda döwlet Baştutanynyň bu sammite gatnaşmak üçin Koreýa Respublikasyna meýilleşdirilýän saparyna taýýarlyk işleri alnyp barylýar. Bu taryhy saparyň çäklerinde Türkmen-koreý işewürler duşuşygyny, medeni çäreleri, milli amaly-haşam sungatynyň we türkmen halysynyň sergisini guramak teklip edilýär.
Şeýle-de, döwlet Baştutanynyň saparynyň netijeleri boýunça ikitaraplaýyn hyzmatdaşlygy işjeňleşdirmek maksady bilen, şu ýylyň ikinji ýarymynda Söwda, ykdysady, ylmy we tehnologik hyzmatdaşlyk boýunça hökümetara türkmen-koreý toparynyň nobatdaky mejlisini geçirmek teklip edilýär.
Häzirki wagtda Koreýa Respublikasynyň Daewoo Engineering & Construction Co., Ltd., Koreya Meditech Co. Ltd., Koryo Shipbuilding Industry Technology Co., Ltd., Hyundai Corporation ýaly iri kompaniýalary bilen himiýa senagaty, gämi gurluşygy we saglygy goraýyş ulgamlarynda bilelikdäki taslamalary durmuşa geçirmek üçin işjeň hyzmatdaşlyk alnyp barylýar.
