Türkmenistanda Beýik Watançylyk urşunda gazanylan Ýeňşiň 81 ýyllygy mynasybetli dabaraly çäreler geçiriler. Ministrler Kabinetiniň Başlygynyň orunbasary B.Mämmedow bu şanly sene mynasybetli meýilleşdirilýän medeni-jemgyýetçilik çäreleri barada Hökümet mejlisiniň dowamynda hasabat berdi. Bu barada «Watan» habarlar gepleşiginde habar berildi.
Şunlukda, paýtagtymyzdaky «Halk hakydasy» ýadygärlikler toplumyna, welaýatlardaky ýadygärliklere hem-de edermen esger Berdimuhamet Annaýewiň heýkeline gül goýmak dabaralary geçiriler. Şeýle hem ýurt boýunça ylmy-amaly maslahatlar, uruş döwrüniň gahrymançylykly sahypalaryny şöhlelendirýän söhbetdeşlikler we sergiler guralyp, uruş hem-de zähmet weteranlaryna baýramçylyk sowgatlary gowşurylar.
Türkmenistanyň Prezidenti Serdar Berdimuhamedow hasabaty diňläp, gahrymançylygyň belent nusgasyny görkezen weteranlar üçin ýurtda ähli şertleriň döredilýändigini belledi. Döwlet Baştutany uruş weteranlaryna we uruş ýyllarynda zähmet çeken enelere Ýeňiş güni mynasybetli ýadygärlik sowgatlaryny gowşurmagy hem-de ähli baýramçylyk çärelerini ýokary derejede guramagy tabşyrdy.
