Amerikaly boks ägirdi Floýd Meýwezer grek kikboksçysy Maýk Zambidis bilen görkezme söweşini geçirer. «Rowaýatylaryň söweşi» diýlip atlandyrylan bu duşuşyk 27-nji iýunda Afinadaky «OAKA» Olimpiýa toplumynda geçiriler. Bu barada Ring Magazine neşiri habar berýär.
Zambidis kikboks boýunça dünýäniň 18 gezek çempiony bolup, ol öz karýerasyny 2015-nji ýylda tamamlapdy. Ol geçiren 180 söweşiniň 158-sinde ýeňiş gazanyp, şolaryň 87-sini nokaut bilen tamamlady.
Meýwezer bolsa professional karýerasyny 2017-nji ýylda Konor Makgregora garşy geçirilen söweşden soň boldum edipdi. Ol karýerasynyň dowamynda geçiren 50 söweşiniň hemmesinde ýeňiş gazanyp, bäş agram derejesinde dünýä çempiony bolmagy başardy. Professional sportdan gidenden soň, ol görkezme söweşlerine gatnaşmagyny dowam etdirýär.
Mundan ozal 19-njy sentýabrda Las-Wegasda Meýwezer bilen Menni Pakýaonyň arasyndaky gaýta duşuşygyň geçirilip bilinjekdigi habar berlipdi. Olaryň 2015-nji ýyldaky ilkinji söweşi boks taryhyndaky iň köp girdeji getiren söweş bolup, şonda Meýwezer eminleriň biragyzdan çykaran çözgüdi bilen ýeňiş gazanypdy.
Zambidis bilen söweş baradaky habar ukrain boks ussady Aleksandr Usik baradaky täzeliklerden soň ýaýrady. Usik 23-nji maýda Müsürde başga bir kikboksçy – Riko Werhuwen bilen ringe çykmagy meýilleşdirýär. Bu duşuşykda agyr agram derejesinde WBC boýunça dünýä çempiony ady orta goýlar.
