Bloomberg agentliginiň habar bermegine görä, Warner Bros. Discovery kompaniýasynyň paýdarlary Paramount kompaniýasynyň aktiwlerini satyn almak baradaky ylalaşygy köplük ses arkaly goldadylar.
Mälim bolşuna görä, geleşigiň bahasy 110 milliard dollara barabardyr. Ylalaşygyň şertlerine laýyklykda, ol güýje girenden soň, Warner Bros.-yň her bir paýdary özüne degişli her aksiýa üçin 31 dollar möçberinde töleg alar. Eger ylalaşyk 30-njy sentýabra çenli tamamlanmasa, paýdarlara garaşylan her çärýek üçin aksiýa başyna 25 sentden töleg tölenip başlanar.
Häzirki wagtda geleşigi ABŞ-nyň we Ýewropa Bileleşiginiň monopoliýa garşy edaralary barlagdan geçirýärler.
Bu ylalaşyk Golluwudyň iň iri iki studiýasyny we olaryň giň mazmunly kitaphanalaryny, şeýle-de Paramount+ we HBO Max ýaly striming platformalaryny birleşdirer.
Birnäçe aýyň dowamynda Netflix kompaniýasy hem Warner Bros.-yň aktiwleri üçin göreşip, kinostudiýalar we HBO Max strimingi üçin takmynan 83 milliard dollar teklip edipdi. Ýöne Paramount-yň has ýokary bahaly teklibinden soň, kompaniýa bu bäsleşikden ýüz öwürdi.
Aprel aýynyň başlarynda kino we teleýaýlym pudagynyň wekilleri bu geleşige garşy çykdylar. Häzirki wagtda Kaliforniýanyň prokuraturasy bu birleşmek ähtimallygy bilen baglanyşykly derňew işlerini alyp barýar.
