Londonyň «Çelsi» kluby baş tälimçi Liam Rosenýoryň wezipeden aýrylandygyny yglan etdi. Topar yzly-yzyna bäş oýunda utuldy we şol duşuşyklarda garşydaşyň derwezesine ýekeje gol hem geçirip bilmedi.
Şular ýaly şowsuz tapgyr klubuň taryhynda 1912-nji ýyldan bäri ilkinji gezek bolup geçýär (klubuň özi 1905-nji ýylda esaslandyryldy).
«“Çelsiniň” ähli işgärleriniň adyndan Liama we onuň toparyna klubda işlän döwründe bitiren hyzmatlary üçin minnetdarlygymyzy bildirmek isleýäris. Möwsümiň ortasynda wezipä belleneninden bäri Liam elmydama ýokary hünärmenlik we dogruçyllyk görkezdi.
Bu çözgüdi kabul etmek klub üçin aňsat bolmady, ýöne soňky netijeler we oýunlar bellenen standartlara laýyk gelmeýär, şu möwsümde bolsa entek bitirilmeli işler köp. “Çelsiniň” ähli agzalary Liama geljekki işlerinde üstünlikler arzuw edýär» – diýlip, klubuň resmi saýtyndaky beýanatda bellenilýär.
Iňlis hünärmeni ýanwar aýynda «Strasburg» klubundan gelip, topara ýolbaşçylyk edip başlapdy. Taraplaryň arasyndaky şertnama 2032-nji ýyla çenli niýetlenipdi.
Angliýanyň çempionatynyň 34 tapgyryndan soň, topar 48 utuk toplap, sekizinji orny eýeleýär. Ýaryş jedwelinde 33 oýundan soň 70 utugy bolan «Mançester Siti» liderlik edýär. Ikinji orundaky «Arsenalyň» hem şonça utugy bar, ýöne ol goşmaça görkezijiler boýunça «ManSitiden» yza galýar.
