Arkadag şäherinde Türkmen bedewiniň milli baýramyna işjeň taýýarlyk görülýär. Bu baýram mynasybetli şäher ilatyna täze ýaşaýyş jaýlarynyň açarlaryny dabaraly ýagdaýda gowşurmak meýilleşdirilýär diýip, häkim Gülşat Mämmedowa habar berdi.
Şeýle hem şäher häkiminiň aýtmagyna görä, baýramçylygyň çäklerinde Arkadag şäherinde ýöriteleşdirilen sergini guramak göz öňünde tutulýar.
Gurbanguly Berdimuhamedow baýramçylyk çäreleriniň we ýöriteleşdirilen serginiň ahalteke bedewleriniň dünýä ähmiýetini hem-de halkyň öz däp-dessurlaryna bolan sarpasyny dabaralandyrmalydygyny belledi. Çäreleriň ýokary derejede guralmagynyň zerurdygy nygtaldy.
Türkmenistanyň Halk Maslahatynyň Başlygy şanly sene mynasybetli bagtyýar ýaşaýjylara täze öýleriň açarlarynyň gowşurylmagynyň goşa baýrama öwrüljekdigini aýtdy.
Mundan başga-da, Halkara atçylyk akademiýasynyň mugallymlarynyň we talyplarynyň gatnaşmagynda atşynaslygyň milli ýörelgelerini wasp edýän telegepleşikleri taýýarlamak bellenildi. Bu meselede ahalteke bedewleriniň üýtgeşik çydamlylygynyň nusgasy hökmünde 1935-nji ýyldaky Aşgabat — Moskwa atly ýörişi ýatlanyp geçildi.
Şeýle-de, geljekde şäherde Oba hojalyk uniwersitetiniň binalar toplumynyň gurluşygynyň meýilleşdirilýändigi we häzirki wagtda degişli meseleleriň öwrenilýändigi bellenildi. Gurbanguly Berdimuhamedowyň aýtmagyna görä, geljekde bu işler şäheriň durmuş we medeni derejesiniň ýokarlandyrylmagyna uly täsirini ýetirer.
