21-nji aprelde Türkmenistanyň Halk Maslahatynyň Başlygy Gurbanguly Berdimuhamedow Arkadag şäherine amala aşyran iş saparynyň dowamynda daşary ýurt dillerini öwredýän ýöriteleşdirilen mekdebi döwrebaplaşdyrmak işleriniň barşy bilen tanyşdy.
Gurbanguly Berdimuhamedow adyndaky Howandarlyga mätäç çagalara hemaýat bermek boýunça Haýyr-sahawat gaznasynyň bejeriş işleri boýunça wise-prezidenti Oguljahan Atabaýewa alnyp barylýan işler barada maglumat berdi. Bellenilişi ýaly, döwrebaplaşdyrmak işleri Gaznanyň goldawy bilen amala aşyrylýar.
Okuw otaglarynyň, şol sanda lingafon otaglarynyň häzirki zaman tejribesini ulanmak arkaly halkara görkezijilere laýyklykda enjamlaşdyrylmalydygy bellenildi. Mekdepde okuwçylaryň diňe bir dilleri öwrenmän, eýsem ylymda we sportda zehinlerini ösdürmekleri üçin dürli gurnaklary guramak hem meýilleşdirilýär.
Sport bilen meşgullanmak üçin bu ýerde açyk we ýapyk stadionlaryň gurluşygy göz öňünde tutulýar. Esasy wezipeleriň hatarynda kesgitlenen bu sport desgalarynda ýaşlar sportuň dürli görnüşleri, şol sanda ýeňil atletika bilen meşgullanyp biler.
Mundan başga-da, mekdebiň ýanynda 320 orunlyk çagalar bagy hereket eder, bu bolsa bütewi bir bilim toplumyny döretmäge mümkinçilik berer.
Şeýle-de, okuwçylaryň ene-atalary üçin zerur mümkinçilikleri özünde jemleýän otagyň döredilmeginiň we gurluşyk işleriniň ýokary hilli ýerine ýetirilmeginiň zerurdygy nygtaldy.
