Ýene ýagyş ýagyp başlady. Ýerimden turmaga ýaltanyp oturan halyma, nädip penjiräniň ýanyna baranymy-da duýman galdym. Penjiräni açanymdan içerä kürsäp giren howanyň çygly ysyny demime dartyp, heziller etdim. Soňam, şybyrdap inýän damjalara «ýüzüni ýuwýan» tebigata seredip, ýagşyň şeýle jadylaýjy güýjüniň nämededigi hakynda pikir öwürdim...
Yzygiderli geçirilýän ylmy barlaglaryň netijesinde ýagyşdan soňky gezelenjiň stresden dynmaga, ýadawlygy aýyrmaga we dünýäni göwnühoş kabul etmäge kömek edýändigi belli boldy. Temperaturanyň 38°C-den ýokary bolan wagty ýagan ýagyş, adatça howany salkynladýar we topragyň, ösümlikleriň hem-de ozonyň ysy has ýiti duýulýar.
Dowamly derňewler ýagşyň diňe bir keýpimize däl, eýsem, pikirleniş ukybymyza-da täsir edip, ýadawlyk duýgusyny we «beýni dumanlamasy» diýilýän ýagdaýy azaldyp bilýändigini-de görkezdi.
Munuň ýene bir düşündirişi, negatiw ionlaryň peýda bolmagy bilen baglydyr. Damjalaryň ýere degmegi netijesinde emele gelýän bu bölejikler beýnimize ornap, serotonin derejesini ýokarlandyrýar we adaty bolmadyk rahatlygy döredýär. Bu hadysa Lenard täsiri hökmünde mälimdir.
Ýagyş howany hapadan we allergenlerden hem arassalaýar. Damjalar bölejikleri özüne çekýär we olaryň ýere çökmegine ýardam berýär. Şeýle halatda dem alşyň bilen birlikde, psihologik ýüküň hem ýeňläp, köşeşen ýaly bolýarsyň.
Ýagşyň sesi – aýratyn lezzet! Damjalaryň birsydyrgyn owazy ruhuň hem bedeniň dartuwyny peseldip, pikirdir duýgularyň ýazylyp-ýaýramagyna kömek edýär.
Ýöne şunça maglumatlaryň toplanandygyna garamazdan, ýagyş ýaganda göwnüňem, göwräňem näme sebäpden ýazlaga çykan ýaly bolýandygynyň syry entegem doly açylmadyk ýaly bolup dur...
