Huawei kompaniýasy «Pura 90» smartfon seriýasynyň tanyşdyrylyşy bilen bilelikde, özüniň innowasion önümi bolan «Watch Buds 2» akylly sagadynyň ikinji neslini resmi taýdan görkezdi. Bu enjam, gulaklyklary göni sagadyň korpusynyň içinde saklamak we zarýad bermek ýaly öňdebaryjy tehnologiýasy bilen bazarda tapawutlanýar.
Sagadyň korpusynda aerokosmos derejeli titanyň ulanylmagy, onuň öňki modelden 200% çydamly bolmagyny üpjün edýär. 1,5 dýuýmlyk, ýokary hilli ekranyň ýagtylygynyň 3000 nit derejesine ýetmegi Gün şöhlesinde-de aýdyň görünmegini kepillendirýär. Sagadyň özi bir gezek zarýad bilen 3 güne çenli işleýär.
Her biri 4 gram agramyndaky gulaklyklaryň simmetrikdigi sebäpli olar «çep» ýa-da «sag» gulak diýip bölünmeýär. Onda şuwwuldyny basýan (ANC) we daşky sesi eşitmäge mümkinçilik berýän «dury ses» (transparency) režimleri bar.
Gulaklyk şuwwuldyny basýan režimi bilen 3 sagat, onsuz 4 sagada çenli işlemäge ukyply.
«Watch Buds 2» saglygyňy ýakyndan yzarlamak üçin hem giň gerimli funksiýalar bilen üpjün edilen. Olar pulsuňy, gandaky kislorodyň derejesini, stresiň we ukynyň hilini yzygiderli yzarlaýar. Şeýle-de oňa ganda şekeriň ýokary bolmak töwekgelçiligini bahalandyrmak we ukyda dem almagyň kesilmegine gözegçilik etmek funksiýalary-da goşuldy.
Gulaklykly «akylly» sagat takmynan 510 dollar bahada, kümüş we gara-çal reňklerde hödürlenýär.
