Huawei kompaniýasy smart-sagatlaryň premium hatarynda täze modeliň — Watch Ultimate Design Star Diamond Blooming Edition sagadynyň çykaryljakdygyny mälim etdi. Onuň tanyşdyrylyşy 20-nji aprele meýilleşdirildi.
Hödürlenen suratlardan görnüşi ýaly, täze önüm diňe bir funksiýalara däl, eýsem aksessuaryň daşky görnüşine hem uly üns berýän ulanyjylar üçin niýetlenendir.
Watch Ultimate Design hatary gymmat bahaly materiallaryň ulanylmagy bilen eýýäm tanalýar. Mundan ozal kompaniýa golf üçin niýetlenen wersiýalaryny we Purple Gold Edition modelini hödürläpdi. Täze wersiýa, adyndan belli bolşy ýaly, gymmat bahaly daşlar ýa-da olaryň ýokary hilli meňzetmeleri bilen birlikde 18 karatlyk altyn bilen bezelip bilner.
Bu seriýanyň esasy modelleri sirkoniniň esasyndaky amorf garyndysyndan taýýarlanylýar, ol bolsa ýokary berkligi we poslama garşy durnuklylygy bilen tapawutlanýar. Şeýle hem sagatlar altyn elementli keramiki bezel bilen üpjün edilýär. Bu modelleriň bahasy 3000 dollardan geçýär, täze wersiýanyň bolsa has gymmat bolmagyna garaşylýar.
Sagadyň seriýanyň esasy tehniki aýratynlyklaryny saklap galjakdygy çaklanylýar: ýakut aýnaly gorag, 1,5 dýuýmlyk LTPO AMOLED ekrany, 100 metre çenli suwa çydamlylyk, EKG goldawy bolan saglyk gözegçiligi funksiýalary we hemra aragatnaşygy.
Hünärmenler premium derejeli dakylýan enjamlara bolan gyzyklanmanyň artýandygyny belleýär, emma şular ýaly modeller, ilkinji nobatda, dizaýna we statusa ähmiýet berýän alyjylara gönükdirilendir.
