Paleoantropologlar neandertal çagalarynyň irki ýaşlarda häzirki zaman çagalaryna garanyňda has çalt ösendiklerini anykladylar. Olar Ysraýyldaky Amud gowagynda tapylan çaga ystyhanyny gaýta öwrenenlerinden soň şeýle netijä geldiler.
Barlaglarda çaganyň diş syrçasy onuň aradan çykan wagtynda 5,5–5,7 aýlykdygyny görkezdi. Ýöne onuň süňkleriniň ösüşi, häzirki zaman 1 ýaş iki aýlyk çaganyňky bilen deňeçerdir. Bu bolsa neandertallaryň beden ösüşiniň häzirki zaman adamlaryndan ep-esli tapawutlanýandygyny aňladýar.
Amud-7 i ystyhany 1992-nji ýylda tapylyp, ol 111 bölekden ybaratdyr (kelle, gol-aýak, oňurga we çanaklyk süňkleri).
Barlaglarda onuň eýesiniň boýy 70,3–78,6 sm, beýnisiniň göwrümi bolsa takmynan 879 kub sm çykdy.
Amud gowagy arheologlara 1960-njy ýyllardan bäri bellidir. Ol ýerde takmynan 56–51 müň ýyl ozal ýaşan neandertallaryň köp sanly galyndylary tapyldy. Barlagyň awtorlary neandertal çagalarynyň galyndylarynyň örän seýrek tapylýandygyny, şonuň üçin olaryň ösüşiniň entek doly öwrenilmändigini belleýärler.
Täze maglumatlar neandertallaryň durmuşynyň ilkinji ýyllarynda häzirki zaman adamlaryndan has çalt ösendiklerini subut edýär. Şeýle-de bu açyş, öňki barlaglarda dişlere we süňklere görä kesgitlenen ýaş görkezijileriniň näme üçin bir-birine gabat gelmeýändiginiň sebäbini-de aýdyňlaşdyrýar.
