Tesla kompaniýasy Model S we Model X modelleri üçin jemleýji boljak çäklendirilen Signature Edition tapgyrynyň çykarylýandygyny yglan etdi.
Bu tapgyr jemi 350 awtomobilden ybarat bolar: 250 sany Model S Plaid we 100 sany Model X Plaid. Olary diňe ýörite çakylyk arkaly satyn alyp bolar.
Awtomobiller özboluşly nar-gyzyl reňke we bezeginde altyn elementlere eýe boldy. Salonda ak alkantara we altyn öwüşginli bezeg detallary ulanyldy. Şeýle hem, her bir nusgada tertip belgisi goýlan ýörite tagtajyk oturdyldy.
Model S karbon-keramiki tormoz ulgamy bilen üpjün edildi. Topluma awtonom dolandyryş funksiýasy bolan bukja, dörtýyllyk hyzmat ediş we Supercharging stansiýalarynda ömürlik mugt zarýad bermek hyzmaty girýär.
Awtomobilleriň bahasy 159 420 dollara deň bolup, bu adaty Plaid wersiýasyndan, takmynan, 35 000 dollar gymmatdyr.
Kompaniýa bu modeller üçin şahsy sargytlary kabul etmegi bes etdi. Frimontdaky zawody döwrebaplaşdyrmak meýilleşdirilýär — ol ýerde Optimus atly adam şekilli robotlaryň önümçiligini ýola goýmak göz öňünde tutulýar.
