UEFA geljekki möwsümden başlap, klub ýaryşlarynyň (Çempionlar ligasy, Ýewropa ligasy we Konferensiýa ligasy) hemaýatkärliginden 1 milliard ýewrodan gowrak peýda almagy göz öňünde tutýar diýip, The Guardian neşiri habar berýär.
Girdejileriň artmagy satuw ulgamynyň üýtgemegi we global hyzmatdaşlaryň sanynyň köpelmegi bilen baglydyr. Indi Çempionlar ligasy üçin diňe bir bukja däl-de, bir möwsümde 531 duşuşygyň geçirilýän üç sany ýaryşyna birden elýeterliligi üpjün edýän dört sany hyzmatdaşlyk maksatnamasy ornaşdyryldy.
Eýýäm AB InBev we Pepsi kompaniýalary bilen altyýyllyk ylalaşyklara gol çekildi. Şunda AB InBev kompaniýasy 35 ýyllap ýaryş bilen hyzmatdaşlyk eden Heineken-iň ornuny tutdy. Mundan öň habar berşimiz ýaly, Nike kompaniýasy hem ýaryşlary top bilen üpjün ediji hökmünde Adidas-yň ornuny eýelemek ugrunda gepleşikleri alyp barýar.
Ýene iki sany şertnama bolsa gutarnykly tapgyrda bolup, olar azyndan 250 million ýewro girdeji getirip biler.
Teleýaýlym hukuklaryndan gelýän we ýylda 5 milliard ýewro töweregi diýlip bahalandyrylýan girdejiler bilen bilelikde, UEFA-nyň umumy girdejisi häzirki 4,4 milliard ýewrodan geçip, 6 milliard ýewrodan hem gowrak bolar. Bu ýagdaýyň öňdebaryjy klublaryň girdejileriniň artmagyna hem getirmegine garaşylýar. Häzirki wagtda baýrak gaznasynyň 74%-ini we ähli ýaryş girdejileriniň 56%-ini Çempionlar ligasynyň toparlary, 17%-ini Ýewropa ligasynyň we 9%-ini Konferensiýa ligasynyň toparlary alýar.
