Parižiň ýaşaýjysy Ari Hodara bahasy 1 million ýewrodan gowrak (takmynan, 1,2 mln dollar) bolan Pablo Pikassonyň hakyky suratynyň eýesi boldy. Ol ony haýyr-sahawat lotereýasynda utup aldy.
58 ýaşly inžener we sungaty söýüji öz ýeňşi barada «Christie's» auksion öýünden wideojaň gelenden soň bildi. Ilkibaşda ol öz bagtyna ynanyp bilmedi.
«Munuň degişme däldigini nireden bileýin?» – diýip, ol sorady.
Bu çäre 2013-nji ýylda düýbi tutulan «100 ýewro bir Pikasso» taslamasynyň çäklerinde geçirildi. Eýýäm üçünji gezek guralan bu lotereýada 120 müňden gowrak bilet satyldy.
Bu guramaçylara, takmynan, 11 million ýewro ýygnamaga mümkinçilik berdi. Bu serişdeler Alsgeýmer keseliniň ylmy-barlag işlerine gönükdiriler.
Täze eýesine ispan ussadynyň 1941-nji ýylda döreden «Zenan seri» (Tête de femme) atly eseri nesip etdi. Ol ony kagyz ýüzünde guaş bilen çekipdir.
«Men diňe haýran galdym, bolany. Şunuň ýaly zada bilet alanyňda, utaryn diýip garaşmaýarsyň... Ýöne men örän bagtly, sebäbi žiwopis bilen gyzyklanýaryn we bu meniň üçin ajaýyp habar boldy» – diýip, Hodara auksionçylar bilen geçirilen telefon söhbetdeşliginde aýtdy.
Portretde Pikassonyň özboluşly stilinde oňa ylham beren zenan — fransuz suratkeşi Dora Maar şekillendirilipdir. Surat kubizm we sýurrealizm elementlerini özünde jemläp, ýüz keşbindäki üýtgetmeler arkaly Ikinji jahan urşy döwrüniň çylşyrymly psihologik ýagdaýyny beýan edýär.
Lotereýa fransuz žurnalisti Peri Koşen tarapyndan Pikassonyň maşgalasynyň we gaznasynyň goldamagynda guraldy.
