Sidneýde geçirilen ýaryşlarda 18 ýaşly awstraliýaly sprinter (ylgawçy) Gout Gout 200 metr aralygy 19,67 sekuntda geçip, 20 ýaşa çenli türgenleriň arasynda täze resmi dünýä rekordyny goýdy. Ýaş türgen diňe bir milli tituly eýelemek bilen çäklenmän, eýsem ýetginjekler sprintiniň taryhyny hem täzeden ýazdy.
Bu ýaryş onuň üçin aýratyn ähmiýete eýe boldy, sebäbi ol öz karýerasynda ilkinji gezek ähli düzgünleri berjaý etmek bilen — ýagny, ugurdaş ýeli hasaba almazdan — 20 sekuntlyk çäkden geçmegi başardy. Bu görkeziji häzirki wagtda dünýäde möwsümiň iň gowy wagty boldy. Gout Gout diýseň okgunly ösüş görkezýär: entek 2024-nji ýylda, ol 16 ýaşyndaka, 20,06 sekunt netije bilen milli rekordy goýupdy.
Bu ýaryşa aýratyn üns berilmeginiň sebäbi, Goutuň görkezen wagtynyň ýamaýkaly meşhur sprinter Useýn Boltuň ýetginjek wagtyndaky netijesinden hem çalt bolmagydyr. 2004-nji ýylda Bolt 200 metri 19,93 sekuntda geçipdi we şol wagt bu netije ýetginjekleriň arasynda dünýä rekordy hasaplanypdy. Goutuň bu üstünligine garamazdan, 20 ýaşa çenli türgenleriň arasyndaky iň gowy wagt amerikaly Erriýon Naýton (2022-nji ýylda 19,49 sek.) bilen baglanyşdyrylýar, emma onuň bu netijesi resmi taýdan tassyklanmady. Resmi taýdan Naýtona degişli bolan 19,69 sekuntlyk rekordy bolsa indi awstraliýaly türgen täzelemegi başardy.
Pellehanadan geçensoň, Gout Gout netijäniň düzgünleriň çäginde görkezilmeginiň öz fiziki ukyplaryny tassyklamak üçin örän möhümdigini belledi. Türgen Glazgodaky Arkalaşyk oýunlaryna gatnaşmagy meýilleşdirmeýändigini, muňa derek awgust aýynyň başynda Oregonda geçiriljek U20 ýetginjekleriň arasyndaky dünýä çempionatyna ünsüni jemlejekdigini habar berdi.
