Wengriýada geçirilen parlament saýlawlarynda «Tisa» oppozision partiýasy ýeňiş gazandy. Ol býulletenleriň 98,9%-i sanalandan soň, sesleriň 53,07%-ini aldy.
Saýlawlara gatnaşyk görkezijisi ýurduň taryhynda iň ýokary derejä ýetip, 79,5% boldy.
Deslapky maglumatlara görä, partiýa parlamentdäki 199 orundan 138-sini eýeleýär. Bu bolsa oňa konstitusion köplügi we ýurduň esasy kanunyna üýtgetmeler girizmek hukugyny berýär.
Premýer-ministr Wiktor Orbanyň «Fides» dolandyryjy partiýasy sesleriň 38,43%-ini (55 orun), «Biziň watanymyz» ultra-sagçy partiýasy bolsa 5,83%-ini (6 orun) aldy.
Şeýlelikde, «Tisa» partiýasy parlamentde konstitusion köplügi eýeledi. 2010-njy ýyldan bäri premýer-ministr wezipesini ýerine ýetirip gelýän Orban wezipesinden gitmeli bolar. Ol ses berişlik tamamlanandan üç sagat geçensoň, ýeňlendigini boýun aldy we «Tisanyň» lideri Peter Madýary gutlady.
Saýlawlaryň netijeleri barada Ýewropa Komissiýasynyň başlygy Ursula fon der Lýaýen hem öz pikirini bildirdi.
«Wengriýa Ýewropany saýlady. Ýewropa elmydama Wengriýany saýlapdy. Ýurt özüniň Ýewropa ýoluny dikeldýär. Bileleşik has-da güýçlenýär» – diýip, ol belledi.
